நானும் கூட நலமாகவே இருக்கிறேன்..

மகிழ்ச்சியின் அடையாளம்
முகத்தின் புன்னகைகள் என்றால்
நானும் கூட
மகிழ்ந்தே இருக்கிறேன்..

அமைதியான வாழ்வின் அடையாளம்
சலனமற்ற உதடுகள் என்றால்
என் வாழ்வும் கூட
அமைதியாகவே இருக்கிறது..

நிம்மதியான உறக்கத்தின் அடையாளம்
இமை மூடிய விழிகள் என்றால்
என் இரவுகளை நான்
உறங்கியே கழிக்கிறேன்..

ஆரோக்கியத்தின் அடையாளம்
சிதைவுகளற்ற தேகம் என்றால்
உலகில் நானே
ஆரோக்கியமான மனிதன்..

உயிர் வாழ்வதற்கான அடையாளம்
இதயத்தின் துடிப்புகள் என்றால்
இன்னமும் இருக்கிறேன் நான்
உயிருடன்..

-- பால் ஆரோக்கியம்